Balik byahe ang 100% unit sang Western Visayas Transport Cooperative subong nga adlaw, matapos nga 50% lamang sang ila units ang nagbyahe kahapon, Marso 25.
Ini amo ang ila ginpatigayon matapos nga naobserbaran nga madamo ang mga pasahero subong nga adlaw bangud sa pila ka mga aktibidad sa siudad kaangay sang graduation kag transport strike.
Sa interview sang Bombo Radyo kay Raymundo Boyet Parcon, Chairman sang WVTC, iya ginpahayag nga ginalikawan nila nga magbyahe ang tanan nila nga units bangud dako na gid ang kaperdehan sang ila nga kooperatiba nga naglab-ot na sa P100,000 kada adlaw.
Suno sa iya, dako gid ang epekto sang padayun nga pagtaas sang presyo sang gatong bangud halin sa P2,500 tubtob P2,700 nga gasto para sa krudo antes ang tension sa Middle East, yara na subong sa masobra P4,000 ang ila nga ginagasto para sa 40 ka litro nga diesel.
Dugang pa sang natungdan, nagahulat sa gihapon sila sang igahatag nga fuel subsidy sang gobyerno, apang padayun man nga nagapati nga ang pagpatuman sang fare hike ang isa sa mangin solusyon agud nga indi man matam-an ang transport sector bangud sa krisis nga ginapangatubang sang pungsod sa produktong petrolyo.
