Dako nga bulig para sa mga myembro sang Western Visayas Transport Cooperative (WVTC) ang inisyatibo sang Iloilo City Government nga maghatag sang fuel subsidy sa mga public utility jeepney drivers kag operators sa siyudad.
Sa interview sang Bombo Radyo kay Mr. Raymundo “Boyet” Parcon, chairperson sang nasambit nga kooperatiba, iya ginapahayag nga dako gid ang ila pagpasalamat sa nasambit nga bulig, bangud makasuporta ini sa ila agud makapadayon ang ila operasyon.
Ginpasiguro man sang WVTC nga magapadayon ang 100% nga operasyon sang ila mga public utility jeepney halin Lunes tubtob Biyernes agud masiguro ang padayon nga serbisyo sa publiko.
Suno kay Parcon, nagalaom man sila nga matapos na ang kinagamo kag tensyon sa Middle East agud magnubo na liwat ang presyo sang mga gatong ilabi na ang diesel.
Dugang pa niya, dako gid nga bulig sa mga driver ang dugang nga P1 sa plete, kon mapatuman ang ila ginapangabay, bangud makabulig ini sa ila kinahanglanon.
