Ginpahayag sang Western Visayas Transport Cooperative ukon WVTC nga may mga konduktor sila nga ginpahalin sa trabaho ukon gin-suspend bangud sa mga reklamo sang pasahero kag paglapas sa mga polisiya sang kooperatiba.
Sa interview sang Bombo Radyo kay WVTC Chairman Raymundo “Boyet” Parcon, ginpahayag niya nga madamo na sila sang ginpang-suspend kag ginpahalin sa trabaho nga mga Public Assistance Officer ukon PAO bangud sa paglapas sang polisiya pareho sang pagpangkuha sang collection, mga complaints sang mga pasahero lakip na ang pagpangakig ukon pagpamuyayaw sang mga konduktor.
Suno kay Parcon, ginakabig nga seryoso nga paglapas ang malain nga pagtrato kag pamatasan sang konduktor sa mga pasahero.
Pahayag niya, kun may reklamo, ginapatawag gilayon ang konduktor sa ila opisina agud mapasabat sa issue kag mahatagan sang kahigayunan nga magpaathag.
Ginhatag ni Parcon bilang halimbawa ang isa ka insidente nga nahulog ang isa ka senior citizen nga pasahero sang nanaog ini sa bus, apang wala ini nahatagan sang bulig sang konduktor.
Bangud sini, gin-suspend sang tatlo ka adlaw ang conductor, samtang ginpabalik naman sa trabaho ang driver bangud suno kay Parco, indi sala sang driver kundi iya mismo sang conductor nga wala nag-alalay sa pasahero.
Ginpahayag ni Parcon, ginbayaran man sang kooperatiba ang mga nagasto sang senior citizen nga pasahero sa iya mga pagbulong bangud sa insidente, kag nagpakig-angut man sila para mangayo sang pasaylo.
Dugang pa niya, kun may yara sang paglapas ang ila personnel, gina-suspend ini sa sulod sang tatlo ka adlaw, apang, kun seryoso ukon balik-balik na ang ila nga paglapas, mahimo na ang mga ini nga kakson sa trabaho.
