Nagmandu na si Department of the Interior and Local Government (DILG) Secretary Benjamin Abalos Jr. nga magtukod sang special investigation team agud matumod ang salabton sang local government officials nga responsable sa paghatag sang permit sa pribado nga grupo para sa pagtukod kag operasyon sang Captainā€™s Peak resort sa Chocolate Hills sa Bohol.
Sa statement sang tiglikom, ginsiling sini nga isa ka protected area ang lugar nga nakasaad sa Proclamation No. 1037, series of 1997 kag sa Republic Act No. 7586 ukon ang National Integrated Protected Areas System (NIPAS) Act of 1992.
Una na nga ginbasol sang Department of Environment and Natural Resources (DENR) ang local officials sa Sagbayan, Bohol bangud sa ila paghatag sang pahanugot sa operasyon sang resort apisar pa nga isa ka UNESCO World Heritage Site ang Chocolate Hills.
Ginhatag ang permits apisar nga wala sang nakuha ang resort nga environmental compliance certificate halin sa DENR.
Suno kay Abalos, ang sin-o man nga local officials nga makit-an nga liable sa diri nga insidente ang posible magpangatubang sang suspensyon ukon posible man nga pahalinon depende sa kabug-aton sang sala.
Magluwas sa Captainā€™s Peak, ang iban pa ng tourism-related establishments sa vicinity sang Chocolate Hills area amo ang Sagbayan Peak sa Sagbayan town kag Bud Agta sa Barangay Buenos Aires sa Carmen town.
Sang nagligad nga semana sang nagguwa ang kuntani matahum nga video kaangot sa Captainā€™s Peak resort, apang ginpakamalaot ini sang publiko bangud sa damage sini sa palibot.
Septyembre 2023 sang nagpaguwa ang DENR sang temporary closure order kag Enero 22, 2024 naman sang ginhatag ang Notice of Violation apang nagpadayon sa pag-operate ang amo nga resort.#
