Napabilin ni Bagyo Carina ang kabaskugon sini samtang yara gihapon sa Philippine Area of Responsibility (PAR).
Base sa 5:00 A.M. nga weather bulletin sang PAGASA, nakasaad nga ulihi nga nakit-an ang sentro sang weather disturbance sa kalayuon nga 380 km nasidlangan sang Aparri, Cagayan.
Dala sini ang kabaskugon sang hangin nga 130 km/h malapit sa sentro kag pagmadlos nga tubtub sa 160 km/h. Nagahulag ini paanaminhan-naaminhan-nakatundan sa kadasigon nga 10 km/h.
Yari ang mga lugar nga napaidalom sa Wind Signal No. 1 kag magaeksperyensya sang mabaskog nga hangin sa sulod sang 36 ka oras.
LUZON: Batanes, Babuyan Islands, ang northern kag eastern portions sang mainland Cagayan, ang eastern portion sang Isabela, ang northern portion sang Apayao , ang northern portion sang Ilocos Norte, ang northern portion sang Aurora, Polillo Islands, Calaguas Islands, kag ang northern portion sang Catanduanes
Samtang, ang Habagat nga ginpabaskog pa ni Carina ang mahimo magdala sang mabaskog nga pag-ulan sa nakatundan nga bahin sang Luzon halin subong nga gab-i tubtub sa Huwebes.
Gina-forecast man nga malab-ot sang bagyo ang peak intensity sini sa masunod nga duha ka adlaw.
Ginalantaw nga magapabilin ini nga malayo sa Philippine landmass kag magaguwa sa Philippine Area of Responsibility kasunod sang landfall sa naaminhan nga bahin sang Taiwan sa tunga-tunga sang Miyerkules sang gab-i kag Huwebes sang aga.
