Mas maduagon pa gid ang kabuhi sang isa ka tawo kun siya ang nagahigugma.
Amo man ini ang ginapatihan sang isa ka 100-anyos nga war veteran nga natalana nga magpakasal sa iya nga 96-anyos nga sweetheart sa masunod nga bulan!
Love story ini nanday US Air Force veteran Harold Terens kag ang soon-to-be bride nga si Jeanne Swerlin. Handa na sila sa seremonya sang kasal nga hiwaton sa France nga amo man ang lugar kun sa diin nagpangalagad si Terens sang World War II.
Sa Hunyo 6 ukon duha ka adlaw antes ang ila nga kasal, pasidunggan man si Terens kadungan sang komemorasyon sang 80th anniversary sang D-Day landings sa Normandy, ang maragtason nga allied operation nga amo ang nagpalain sa dalagan sang gyera sang amo nga tyempo.
Magabayluhanay naman sang vows ang duha sa Carentan-les-Marais nga malapit sa kadagatan kun sa diin linibo anay ka soldado ang nagtabok kag napatay sang amo nga adlaw sang 1944.
Apisar sa iya edad subong, preska pa sa paminsaron ni Terens ang mga hitabo sang naga-edad pa lamang siya sang 18-anyos, ang tyempo nga ginbombahan sang Japan ang US Navy base sa Pearl Harbor.
Kaangay sa iban nga bataon nga mga Amerikano, nagpa-enlist man ini kag sa edad nga 20, eksperto na ini sa Morse code kag nagsakay sa barko pakadto sa England kun sa diin na-assign siya sa squadron sang apat ka P-47 Thunderbolt fighters. Siya ang responsable sa ground-to-air communication.
Nadulaan ang ila company sang 60 ka mga eroplano kadungan ang Normandy operation kag pagkatapos sina, nagboluntaryo si Terens nga magbyahe sa rehiyon sa northern France agud magbulig nga mapasakay ang German prisoners of war kag mahilway ang Allied troops pa-England.
Pagkatapos sang gyera, nagpakasal na siya sa iya kahagugma nga si Thelma. Naglawig sang pito ka dekada ang ila pag-asawahay sa Florida kag nagbunga ang ila paghigugmaanay sang tatlo ka mga kabataan.
Sang 2018, napatay na si Thelma rason nga tuman naman ang kasubo ni Terens kag halos indi gid mauntat ang iya kahidlaw sa iya nga asawa.
Nahatagan lamang ini sang preska nga panugod sang 2021 sang ginpakilala siya sang iya abyan kay Jeanne Swerlin nga isa man ka balo kaangay niya.
Indi kaangay sa iban nga lovers, wala sang kilig sa ila una nga pagkit-anay, apang bangud sa dalayon nga pagkit-anay kag date, halos indi na sila maseparar sa isa kag isa.
Pareho na nga excited ang duha nga maka-“I Do” kun sa diin ang apo pa mismo ni Terens ang magakanta sang “I Will Always Love You”.
Sa edad nga 100, ginpahayag sang military veteran nga wala na siya sang iban pa nga mapangayo pa: “I got it all. I’m probably the luckiest guy in the world.”#
Photo: AFP
