Nagaplano si Senator Robin Padilla nga mag-file sang ethics complaint batok kay Sen. Francis “Kiko” Pangilinan bangud nga ginaalegar nga ginsinggitan siya sini sa plenary session.
Kun balikan ang natabo sa sesyon kahapon, may speech si Padilla kaangot sa tuyo nga pag-aresto kay Senator Ronald “Bato” Dela Rosa kun sa diin ginaalegar sini nga may harassment kag human rights violations nga nahimo ang NBI agents.
Bilang sabat, nag-raise sang point of order si Pangilinan kag nagsiling nga dapat sa committee istoryahan ang gusto ni Padilla sa baylo nga sa plenaryo.
Nagsabat si Padilla, apang gin-utod siya ni Pangilinan, kag nag-insister nga siya para ang yara sa floor bangud siya ang nagahambal.
Sang ulihi, nagpamangkot si Padilla kay Senate President Pro Tempore Loren Legarda kun may yara bala sang patakaran nga okay lang nga singgitan ang kapareho nga senador.
“Gusto ko po sanang ireklamo si Senator Kiko Pangilinan sa pagsigaw. Meron po ba sa rules na sinasabing pwede mong sigawan ang kapwa mo senador?” pamangkot sang actor-turned-senator.
Gin-suspend ni Legarda ang sesyon agud ila anay ila nga ma-istoryahan.
Nakit-an pa nga nagtanyag pa si Pangilinan nga mag-kamusta kay Padilla apang wala ini ginabaton ni Padilla bisan pa nga ginatumpukan na sila sang mga kaupod nila nga mga senador.
Sa interview kay Padilla, ginsiling sini nga wala siya naanad nga singgitan siya bisan pa nga ihambal sang iban nga natural lang ini nga nagakatabo sa Senado.
“Eh sa akin talaga, hindi ako sanay na sinisigawan. Sinasabi nila na natural ‘yan dito, sa akin hindi,” suno kay Padilla. “Ngayon, kung saan makakarating ang reklamo ko, bahala na magdesisyon kung sino man ang magiging chairman ng committee on ethics,” dugang sini.
Nagpanawagan man ini kay Pangilinan nga magpangayo sang pasensya sa iya sa mismo plenaryo sang Senado.
“Mag-apologize ka muna doon. Kailangan sa plenary mo gawin,” pahayag pa sini.
Natabo ang tensyon sa una nga adlaw sang sesyon sa Senado kun sa diin nagbaliskad na ang majority kag minority. Kabahin na subong si Padilla sang majority bloc sa pagpanguna ni newly-elected Senate President Alan Peter Cayetano.
‘KONTRA-REKLAMO SA ETHICS COMMITTEE’
Indi naman mag-atras si Senator Pangilinan pananglitan nga may ethics complaint nga ipasaka si Senator Padilla.
Suno kay Pangilinan, sa iya malawig nga pagserbisyo sa Senado kag sa kadamo nga beses nga may pagsaka sang tingog samtang yara sa chamber, daw amo pa lang matabo nga may ipasaka nga kaso sa Ethics Committee bangud sa amo nga rason.
Pahayag sini, indi malikawan ang mainit nga mga argumento sa plenaryo ilabi na kon sensitibo ang isyu, kag kon kabigon ini nga paglapas sa ethics, madamo na kuntani nga mga senador sang una ang napasakaan sang reklamo kag nadagdagan sang silot.
“Kung laban sa ethics yun, marami na sanang mga senador ang sinampahan at pinarusahan. Zero cases. Huwag maging balat sibuyas. Walang legal na basehan at walang kwenta ang ethics case complaint na yan. Hintayin na lang natin yung reklamo nya,” suno kay Pangilinan.
Dugang pa niya, handa siya nga sabton ang bisan ano nga reklamo nga ipasaka batok sa iya kag magapasaka man siya sang reklamo sa Ethics Committee batok kay Padilla. Ginpanindugan sang senador nga may mga nalapas si Padilla sa parliamentary rules bangud nga out of order ini kag nadulaan sang proper decorum, nagapamahog sa iya samtang yara sa plenary session kag samtang naka-recess.
“Kung sakali man, sasagutin ko ng kontra-reklamo sa Ethics Committee sa kanyang paglabag sa parliamentary rules at pagiging out of order at sa kawalan ng proper decorum, ang pagbabanta sa akin, pananakot at paninindak sa akin sa plenary session kanina habang naka recess. Hindi uubra ang pambubully at pa siga siga sa akin,” dugang sini.
Mas may basehan suno sa iya nga kasuhan ang mga pasiga-siga, pangbastos kag pagkadula sang proper decorum sa kaangay nga senador sa Senado.
Ginklaro man sini nga indi niya gusto sang away kag indi man siya palaaway, apang indi sini pag-atrasan ang sin-o man kun gusto nila ang amo sini nga wala pulos nga kasuhay.#
