ILOILO CITY – Ginpatpat sang isa ka marine biologist kun paano makakuha sang kompensasyon ang mga naapektuhan sang oil spill matapos maglupok ang power barge sang AC Energy.
Sa exclusive interview sang Bombo Radyo kay Dr. Rex Sadaba, isa ka marine biologist kag anay program manager sang University of the Philippines-Visayas Oil Spill Response Program sang 2006, iya ginpahayag nga nakadepende sa halit ang polusyon nga matuga ang pag-claim sang kompensasyon.
Suno kay Sadaba, halimbawa sang mga mahimo ma-claim amo ang property damage, cost of the clean up operations, economic losses sang mga mangingisda, economic losses sa turismo kag rehabilitation.
Ginpahayag sang natungdan nga may kaugalingon man nga insurance ang AC Energy kag nakadepende na sa mga ma claim kun ano nga sahi sang damages ang nag apekto sa ila.
Samtang, ginpadulungan man ni Sadaba ang mga coastal barangay sa Buenavista, Guimaras nga apektado sang oil spill.
Suno kay Sadaba, ang pinkamalala nga naapektuhan amo ang Barangay Getulio sa diin 100 porsyento nga napuno sang bunker fuel ang gamot sang mga mangroves ukon bakhawan.
Magluwas sini, indi naman mahimo nga makapangisda ang mga residente bangud kontaminado na sang tubig dagat sang bunker fuel.
Ginpahayag sang natungdan nga 16 sa 17 ka mga coastal barangay sa Buenavista, Guimaras ang tuman nga naapektuhan sang oil spill.
