Ginbuyagyag sang Department of Interior and Local Government ang paghimbunanay sang mga high-ranking police officials agud nga matakpan ang isa pa ka pulis nga involved sa iligal nga droga sang 2022.
May kaangtanan ini sa natabo nga pagkumpiskar sa 990 ka kilo sang shabu sa drug raid sa Oktubre sang nagligad nga tuig sa Tondo, Manila kun sa diin ang involved nga pulis amo si Police Master Sergeant Rodolfo Mayo Jr. nga myembro mismo sang Philippine National Police – Drug Enforcement Group.
Ang amo nga droga nga ginabanta nagabalor sang P6.7 billion amo ang ginakabig pinakadaku nga nakumpiskar sa pungsod.
Suno kay Interior Secretary Benhur Abalos, natukiban ang tuyo sang iban nga mga pulis nga takpan ang pagdakop kay Mayo paagi sa imbestigasyon nga ginhimo sang National Police Commission.
Pebrero subong nga tuig sang nagsulat si Abalos sa PNP nga i-follow up ang amo nga kaso bangud makatilingala kun ngaa kadugay sang resulta sang imbestigasyon kag sa rekomendasyon.
Diri man kag ginpabusisi ang posible involvement sang iban nga mga pulis.
Ang ginkainit pa gid ni Abalos amo nga nagpahibalo ang isa ka opisyal sang pulis nga nagtutok lamang ang ila nga imbestigasyon sa tuyo sang duha man ka pulis nga kawaton ang 42 ka kilo halin sa 992 ka kilo sang shabu nga nakumpiskar sang amo nga tion.
Matandaan nga nakit-an mismo sa CCTV kun paano gintuyo nga ipalagyo kuntani ang 42 kilos sang shabu kag ginkarga sa salakyan man sang pulis, apang sang ulihi natigayon man nga nabalik sa otoridad.
Kasunod sini nagmandu si Abalos sa ginabanta 10 ka police officials lakip na sa isa ka officer nga may rank sang one-star general nga mag-leave anay samtang padayon pa ang imbestigasyon. Pananglitan indi mag-leave, ipaidalom sila anay sa preventive suspension suno sa tiglikom. ##
