Nasapwan nga wala na sang ulo kag nahigot pa sa puno sang kahoy ang lawas sang isa ka 12-anyos nga bata nga babaye sa Toledo City, Cebu.
Ginkilala ang biktima nga si Crystal Joy Lagaras Abarquez, Grade 6 pupil nga masobra isa ka semana na nga missing antes nakit-an ang lawas.
Natultulan ang bangkay sang bata matapos nga gintaban sang ido ang iya nga tiil.
Ginpahibalo sang tag-iya sang ido ang awtoridad kag paagi sa search operations, natultulan ang lawas sang bata nga nahigot sa kahoy kag may shoelace man sa iya liog.
Yara na sa advanced state of decomposition ang lawas, samtang nakit-an naman ang ulo sini malapit man sa amo nga area sang kagulangan.
Na-identify naman sang iloy nga anak sini ang biktima bangud sa jogging pants kag kulintas nga iya ginasuksok.
Sa pagpangusisa sang kapulisan, nakita sa CCTV footage ang biktima sang Pebrero 11 sang hapon sakay sa motorsiklo sang lalaki nga nakasuksok sang kalo.
Suno kay Toledo Police chief Police Lieutenant Colonel Roland Barraquio, gin-identify sang mga testigo ang suspek nga pakaduha man mismo sang biktima.
Todo naman ang panginwala sang suspek, bangud suno sa iya, bata pa ang biktima, kag sa pagkamatuod suno sa iya, nagbulig pa siya gani sa pagpangita.
Ginahulat pa sang pulis ang autopsy results agud matumod kun na-rape ang biktima. Apang antes pa man sini, ginpreparar na ang kaso nga murder batok sa suspek nga subong arestado na.
Nahibaluan man sa pagpanalawsaw nga may nauna na nga duha ka kaso nga rape ang suspek sa Iloilo. Sandig pa sa pulis, may history man ang suspek sa paggamit sang iligal nga droga.#
