CROATIA – Ginmando sang justice minister sang Poland sa Warsaw Prosecutor’s Office ang pag-imbestigar sa natabo nga aksidente sang bus sa dalanon sa Croatia sa diin napatay ang 12 ka mga Polish pilgrims.
Suno kay Bombo International Correspondent Neva Intrepido, tanan nga 32 ka mga nakaluwas nga pasahero ang pilason sa diin 19 sa mga ini ang kritikal.
Ang trip nga gin-organized sang Brotherhood of St Joseph Catholic group ang ginalakipan sang tatlo ka mga pari kag anom ka mga madre.
Ang mga ini ang padulong kuntani sa Medjugorje, isa ka Catholic shrine sa Bosnia.
Nagbiya ang bus halin sa Czestochowa City matapos ang prayer service.
Naghalin naman ang mga pasahero sa nagkalain-lain nga rehiyon sa Poland.
Natabo ang aksidente samtang naga-travel ang mga ini sa tunga sang dalanon sang Jarek Bisaski kag Podvorec, ukon sa north-east sang Zagreb.
Nagpalab-ot naman sang pag-unong kag kasubo si Croatian Prime Minister Andrej Plenković sa pamilya sang mga napatay nga biktima.
Nahibaluan nga pilgrimages sa banwa sang Medjugorje ang bantog sa Poland kasunod sang report nga nakita sang mga kabataan si Virgin Mary sa lugar sang 1980’s.
