Mas nagapalapit pa sa plenary debates sa Senado ang hagna nga nagaduso nga himuon nga legal ang medical marijuana sa Pilipinas.
Ini matapos nag-pirma ang 13 ka mga senador sa committee report nga gin-sumite sang joint Senate committees on Health and Demography, on Public Order and Dangerous Drugs, kag on Finance.
Buot silingon sini, ang Committee Report No. 210, nga nagaunod sang Senate Bill 2573 ukon ang proposed “Cannabis Medicalization Act of the Philippines” ang mahimo na nga ma-sponsor sa Senate plenary for debates.
Lakip sa nagpirma sa Senate Bill 2573 amo si Senator Robin Padilla nga amo ang principal author kag chairman sang subcommittee nga naga-diskusyon sa proposal; Senators Bong Go; Sonny Angara; kag Ronald “Bato” dela Rosa.
Lakip man sa nagpirma amo sanday JV Ejercito, Jinggoy Estrada, Mark Villar, Lito Lapid, Raffy Tulfo, Ramon “Bong” Revilla Jr., Grace Poe, Minority Leader Aquilino “Koko” Pimentel III, kag Majority Leader Joel Villanueva.
Nagpirma sanday Poe, Villanueva, Pimentel, kag Estrada apang maga-interpellate, samtang sanday Go, Villar, kag Revilla ang nagpirma apang may reservations.
Sa idalom sini nga hagna, pahanugutan ang paggamit sang cannabis ukon marijuana agud nga bulngon ang debilitating medical condition ukon ang mga sintomas nga yara sa pasyente.
Ang medicalization sini ang maga-lakip sang acquisition, possession, transportation, delivery dispensing, administration, cultivation, ukon manufacturing sang pribado nga mga indibidwal ukon kumpaniya para sa medical kag research purposes.
