ILOILO CITY – Nagdangat sa 16 ka mga trabahante ang napatay kag madamo ang ginapatihan na-trap matapos nga nag-collapse ang crane sa ginakay-o nga taytay sa western Indian state nga Maharashtra.
Sa video, makita ang natumba nga crane samtang nga nagapangita sang survivors ang mga rescuers malapit sa site sa Thane, isa ka syudad nga yara lang sa gwa sang Mumbai.
Gindala naman sa ospital ang tatlo ka mga tawo nga napilasan.
Suno sa report, ang crane ang gingamit sa pag-install sang precast box girders sa ginatukod nga highway kag high-speed rail nga mga taytay.
Nagpalab-ot naman sang pag-unong sa pamilya nga nalisdan si Prime Minister Narendra Modi.
Gin-anunsiyo sang opisina ni Modi nga magahatag sila sang relief assistance nga 200,000 rupees ukon masobra sa P130, 000 para sa pamilya sang mga napatay kag 50,000 rupees ukon masobra P30, 000 para sa pamilya sang mga napilasan.
