Padayon nga gina-imbestigaran sang kapulisan ang duha ka separado nga pagpamahog sang pagpangluthang sa duha ka eskwelahan nga nahamtang sa Batangas kag Negros Occidental.
Sa Batangas City Integrated High School, gin-suspinde ang klase kahapon, Hunyo 29, matapos nga may wala pa makilala nga tawo nga nag-post sang online sang pamahog nga luthangon ang pila ka mga estudyante.
Suno sa pulis, nakita sang mga opisyal sang eskwelahan ang mga mensahe sa opisyal nga Facebook page sang eskwelahan sang Domingo sang gab-i.
Ginsiling sa post nga target ang pila ka estudyante sa Grades 7 tubtob Grade 10 kag gin-claim sang nagpost nga gina-bully siya sang mga “target.”
Bangud sini, gilayon nga ginsuspender sang Department of Education Region 4-A kag sang administrasyon sang eskwelahan ang tanan nga klase kag on-site nga aktibidad agud masiguro ang seguridad sang mga estudyante kag mga empleyado.
Padayon ang imbestigasyon sang Philippine National Police agud makilala ang tag-iya sang dummy Facebook account nga nag-post sang pagpamahog. Naglunsar man sang digital investigation ang PNP Anti-Cybercrime Group agud ma-trace ang ginhalinan sang online nga mensahe.
Suno sa pulis, wala sang nakita nga iban pa nga peligro sa sulod sang eskwelahan magluwas lang sa ginpost nga pamahog sa Facebook.
Samtang, nagaimbestigar man ang pulis sa Negros Occidental sa lain naman nga online shooting threat nga nagalakip sa mga estudyante sa Escalante City matapos naglapta sa social media ang screenshots sang isa ka online nga pag-istoryahanay sang duha ka mga estudyante nga may kaangtanan sa ginapahayag nga pagpamahog sang pagpaniro sa Escalante City National High School.
Bangud sini, naglapta man ang panawagan sa mga ginikanan nga indi anay pagpaiskwelahon ang ila mga kabataan, tubtub nga nag-anunsyo na ang eskwelahan nga maga-shift anay sa alternative delivery mode bilang kabahin sang pagpangaman.
Nagkoordinar ang kapulisan sa administrasyon sang eskwelahan, sa mga ginikanan, kag sa City Social Welfare and Development Office agud mahibaluan ang ginhalinan kag kabug-aton sang online threat.
Bilang kabahin sang imbestigasyon, boluntaryo nga nagtugot ang mga ginikanan sang estudyante nga ginapatihan nga nalakip sa istoryahanay nga usisaon sang mga imbestigador ang cellphone sang ila kabataan. Ang digital examination nagatinguha nga makilala ang iban pa nga nalakip sa chat kag mahibaluan kun may yara gid man sang aktuwal nga pamahog.
Samtang, nagsugod man ang Escalante City National High School sang bag inspection bilang dugang nga tikang sa seguridad. Suno sa administrasyon, ang tikang nagatinguha nga mapabilin nga safe kag matawhay ang palibot sang eskwelahan.
Nagapanawagan naman ang mga awtoridad sa publiko nga magpabilin nga kalmado kag indi magpalapta sang wala pa napamatud-an nga impormasyon samtang padayon ang imbestigasyon.
Nagguwa ini nga “pagpamahog” kasunod sang insidente sa San Jose National High School sa Tacloban kun sa diin duha ka Grade 9 students ang suspek sa shooting incident nga ginkamatay sang tatlo sa ila schoolmates.#
