Ginkumpirma sang Police Regional Office-Negros Island Region nga safe ang tanan nga personnel sang Regional Mobile Force Battalion (RMFB) matapos ang engkwentro batok sa ginaalegar mga katapo sang rebelde sa Sitio Kabalagnan, Barangay Lalong, Calatrava, Negros Occidental subong nga adlaw, Hunyo 14.
Suno sa PRO-NIR, madinalag-on nga na-extract ang operating team paagi sa Quick Reaction Team.
Wala sang na-report nga may nasamaran sa bahin sang gobyerno samtang padayon naman ang pag-ayam sa mga rebelde.
Una na nga ginpahayag sang RMFB nga naka-engkwentro sang mga personnel sang 1st Platoon, 2nd Maneuver Company ang ginapasuni nga mga myembro sang Communist Terrorist Group (CTG) samtang nga nagahatag sila sang security assistance sa municipal local government operations officer.
Sang nabaton na ang report, gilayon ginpadala ang team halin sa 2nd Maneuver Company agud magbulig sa operating team.
Sa ila padayon nga pagpangusisa sa lugar, na-recover ang nagkalabuka nga 5.56 caliber rifle nga subong ginapaidalom na sa examination kag documentation bilang kabahin sang imbestigasyon.
Padayon man ang koordinasyon sang RMFB sa Calatrava Municipal Police Station kag Bravo Company kag sa 79th Infantry Battalion sang Philippine Army nga naka-base sa Barangay Tigbon, Calatrava agud nga mapabakod pa ang seguridad kag masustiner ang pursuit and monitoring operations sa amo nga banwa.
