Arestado pinaagi sa gahom sang warrant of arrest ang duha ka solterito nga ginatudlo nagmolestya sa isa man ka menor de edad.
Nadakpan ang isa ka 16-anyos nga suspek sa Railway Street, Barangay Zone 5, Sta. Barbara samtang nadakpan naman ang 17-anyos nga suspek sa Merlo Street sa Barangay Zone 2 sa amo man nga banwa.
Ang mga katapo sang Sta. Barbara Municipal Police Station kag 1st Iloilo Provincial Mobile Force Company amo ang nagpatuman sang warrant of arrest.
Sa interview sang Bombo Radyo kay PMaj Jose Rey Pabalan, hepe sang Sta. Barbara Municipal Police Station, iya ginpahayag nga ang duha nga yara sa listahan sang most wanted sa banwa ang may kaso nga rape by sexual assault under Article 266-A (Paragraph 2 of the Revised Penal Code as amended) kag rape under Article 266-A, (Paragraph 1 in relation to Article 266-B of the RPC) as amended by Republic Act 8353.
Suno kay Pabalan, gin-isyu ang warrant of arrest sang Enero 9 kag wala sang piyansa nga ginrekomendar para sa kaso nga rape samtang P120,000 naman ang piyansa para sa kaso nga rape by sexual assault.
Yara na sa kustodiya sang Municipal Social Welfare and Development Office.
Nahibaluan nga magluwas sa duha ka nadakpan, may isa pa sila ka upod nga suspek man apang nakapiyansa ini bangud nga bailable ang offense nga ginpasaka batok sa iya.
