ILOILO – Nagalaum si SB Member kag Committee on Appropriations Chairman Domingo Jr. nga mapasar na ang 2020 budget sang probinsya sang Iloilo sa patigayunon nga session sang Sangguniang Panlalawigan subong nga adlaw, Disyembre 10.
Sa interview sang Bombo Radyo kay Oso, iya ginpahayag nga indi na niya luyag nga may delay pa nga matabo kag masulit ang mga isyu sang 2019 budget nga amo ang ginakabig rason sang kadam-an kun ngaa wala nadala ang probinsya sa Seal of Good Local Governance (SGLG) sang Department of Interior and Local Government (DILG).
Suno kay Oso, ang budget ang ginsumite na para sa first reading sang nagligad nga Martes.
Ini ang nagalakip sang general fund nga P3, 029, 873, 051 kag local economic enterprise fund nga P1, 060, 845, 373.00.
Dugang pa ni Oso, wala man sang madamo nga reklamo ukon kwestiyon nga napalab-ot santu sa ila first reading.
Bangud sini, ginalauman nga mahingaw na ini sa second and final reading subong nga adlaw ilabi na bangud subong man ang katapusan nga session sang Sangguniang Panlalawigan subong nga tuig.
