Pagatutukan sang Kamara de Representantes ang gin-alegar nga “unexplained wealth” kag mga isyu sa Statement of Assets, Liabilities, and Net Worth ukon SALN ni Vice President Sara Duterte sa masunod nga impeachment hearing.
Suno kay House Committee on Justice Chairperson Gerville Luistro, nagpagwa na sang subpoena ang komite batok kay anay Senador Antonio Trillanes IV agud patambungon ini sa hearing sa Abril 22.
Ginakabig si Trillanes nga kabahin sang Saballa et al impeachment complaint, ilabi na sa isyu sang indi maathag nga manggad sang Bise Presidente.
Ginkumpirma man ni Luistro nga gin-imbitar ang mga opisyal sang Anti-Money Laundering Council ukon AMLC, kag ginapaabot man ang pagpresentar sang mga dokumento nga may kaangtanan sa bank transactions sang mag-asawa nga Sara Duterte kag Manases Carpio.
Ginalauman man nga magtambong ang mga representante halin sa Securities and Exchange Commission, Bureau of Internal Revenue, kag Office of the Ombudsman.
Ang masunod nga hearing mangin isa ka clarificatory hearing agud mangin maathag ang mga alegasyon batok sa Bise Presidente, lakip na ang gin-alegar nga indi kumpleto nga pagdeklara sang iya mga ginapanag-iyahan kag manggad.
Samtang, ginpahayag ni Luistro nga ginatugyan na niya sa mga miyembro sang komite ang desisyon kun kinahanglan pa liwat si Ramil Madriaga, ang ginatawag nga self-proclaimed bagman, sa masunod nga imbestigasyon.
