Pangunahan ni President Ferdinand Marcos Jr. ang inagurasyon sang Cebu-Negros-Panay Backbone Project Stage 3 sa Lunes, Abril 8.
Gin-anunsyo ini kadungan sang Philippine Electric Power Industry Forum 2024 nga ginhiwat sa Iloilo Convention Center, Abril 5.
Lakip si Iloilo City Mayor Jerry Treñas sa nag-abi-abi sa sini nga development bangud ginalauman nga mapaayo sini ang power situation sa isla sang Panay kag malikawan ang major blackouts kaangay sang natabo sang imbukada sang Enero kag imbukada sang Marso subong nga tuig.
Paagi sa pagkumpleto sini, ang power supply sa Cebu ang mahimo na maka-augment sa kinahanglanon sang Panay pananglitan mapalya ang local power plants.
Mismo naman si Department of Energy (DOE) Undersecretary Rowena Cristina Guevara ang nagkumpirma nga nakumpleto na sang National Grid Corporation of the Philippines (NGCP) ang nasambit nga proyekto sang Marso 27 nga apat ka adlaw nga mas temprano ipaanggid sa gin-set sini nga deadline nga Marso 31, 2024.
Matandaan nga ang completion date sini ang orihinal nga natalana sang Disyembre 2020 apang pito ka beses nga naatras bangud ginparalisa sang pandemya ang business operations.
Sa subong suno sa DOE, full capacity na ang dalagan sang bilog nga backbone project sa Visayas.
Ang demand sa sa enerhiya sa Panay ang yara sa 350 tubtub sa 400 MW, kag nagahimo nga 280 MW kun weekends.
Una na nga ginpahayag sang ahensya nga maga-improve ang Panay grid kun matapos na ini nga proyekto kag ang maintenance works sa power plant sang Palm Concepcion Power Corp. (PCPC).#
