Nagdangat sa 3.8 million adult Filipinos ang nadulaan sang trabaho subong nga bulan sang Oktubre bangud sa pandemya.
Santo sa record sang Philippine Statistics Authority (PSA), 8.7 percent ang unemployment rate samtang, 14.4 percent naman ang underemployment rate.
Ang National Capital Region (NCR) ang may ‘highest unemployment rate’ ukon pinakadamo nga wala sang trabaho samtang ang Bangsamoro Autonomous Region in Muslim Mindanao (BARMM) naman ang may pinakamanubo nga numero nga nadulaan sang trabaho.
Ang figures sa bulan sang Oktubre ang ginpaanggid sa 4.6 million jobless Filipinos ukon 10 percent unemployment rate nga narekord sang Hulyo.
Sang Oktubre 2019 ukon sa kaangay man nga bulan, 4.6 percent ang unemployment rate sa diin halos pilo ang nadulaan sang trabaho subong nga tuig.
Sang Abril, ang jobless rate ang yara sa 17.7 percent ukon kabug-usan nga 7.2 million nga unemployed nga resulta sang economic shutdown.
Samtang, sa independent survey naman sang Social Weather Stations (SWS), nagdangat sa 39.5 percent ukon 23.7 million Filipino ang nadulaan sang trabaho sang Oktubre.
Ang PSA kag SWS ang nagagamit sang nagalain-lain nga metrics sa pag-isip sang unemployment.
Ang unemployment ang nagtaas subong nga tuig umpisa sang nagpatuman ang gobyerno sang world’s longest and strictest lockdowns humalin sang Marso tubtub Hunyo nga isa ka tikang agud mapunggan ang pagdamo sang COVID-19 cases.
