Naglab-ot na sa 35 ka mga bangkay ang narecover sang mga awtoridad sa MV June Aster sa Coron, Palawan kahapon nga adlaw, Setyembre 11.
Ini matapos nga nasunog ang nasambit nga barko sang nagligad nga Setyembre 9 kag gindeklarar nga fireout kahapon lamang nga adlaw.
Suno kay Philippine Coast Guard spokesperson Commodore Noemie Cayabyab, amat-amat nga natigayon ang retrieval and transfer sang mga bangkay sang mga biktima pinaagi sa BRP Cape Engaño.
Ginpakigbahin man niya nga subong nga adlaw, Setyembre 12, igadul-ong sa Port of Borac sa Palawan ang nasambit nga mga bangkay.
Nahibaluan nga natigayon man nga marescue ang 43 ka mga indibidwal sa nasambit nga sunog.
Sa subong, nagakoordinar na ang kumpanya sang nasambit nga barko sa pamilya sang mga biktima kag survivors kun sa diin magahatag man ini sang burial assistance sa nagtaliwan sa nasambit nga trahedya.
