Ginkumpirma sang pulis nga nagdangat sa 40 ka basiyo sang bala kag isa ka police-issued firearm ang ila nga na-recover kasunod sang pagpangluthang sa sulod sang San Jose National High School sa Tacloban City kahapon, Hunyo 22.
Sa amo nga insidente, apat na ang patay. Nagsaka naman sa 20 ang numero sang mga estudyante nga nasamaran nga subong padayon nga ginabulong sa apat ka mga ospital.
Ang mga suspek amo sanday alias Rod, 15-anyos, kag alias Nash, 14-anyos, lunsay Grade 9 students pa lamang sa amo nga eskwelahan.
Nagagwa sa inisyal nga imbestigasyon nga nagsulod sila sa duha ka classrooms kag nagpangluthang sa 40-50 ka classmates nila sang alas nueve sa aga.
Base sa Philippine National Police (PNP), ang isa sa duha ka pusil nga gin-gamit sa pagpangluthang amo ang 9mm Glock pistol nga gin-isyu sa babaye nga pulis sa Police Regional Office 8.
Natukiban nga ini nga pulis amo ang tiya sa isa sa mga suspek.
Ang isa naman ka pusil nga .38 caliber revolver ang rehistrado sa security agency sa Cebu City.
Suno kay PNP Spokesperson Colonel Allen Rae Co, nagguwa sa ila nga imbestigasyon nga ang isa sa mga suspek ang nag-reload pa ukon nagbutang sang mga bala sa handgun kadungan mismo sang insidente.
Sandig sa awtoridad, gindala sang isa sa mga suspek ang pusil sa eskwelahan paagi sa pagsulod sini sa iya sling bag, samtang wala naman na-monitor sang security guard ang isa.
Napaidalom na ang duha ka bata sa police custody.
Ginmandu naman ni President Ferdinand “Bongbong” Marcos Jr. ang tul-id nga imbestigasyon sa insidente.
