ILOILO CITY- Ginapatigayon subong sa Iloilo City ang 41st National Social Action General Assembly (Nasaga) sang Caritas Philippines.
Sa interview sang Bombo Radyo Iloilo kay Msgr. Meliton Oso, director sang Jaro Archdiocesan Social Action Center, iya ginpahayag nga ini ang pinakadako nga pagtililipon sang mga social action centers gikan sa nanuhay-tuhay nga dioceses sa bilog nga pungsod.
Suno kay Msgr. Oso, subong nga tuig, masobra sa 60 ka mga dioceses ang nagpadulong sa Iloilo City agud mangin kabahin sang assembly nga ginapatigayon kada duha ka tuig.
Ginpahayag niya nga katuyuan sang pagtililipon nga hibaluon ang mga programa sang 85 Diocesan Social Action Centers ilabi na sa aspeto sang pagprotekta sa dunang manggad, pag-atubang sa kalamidad, mga isyu nga pang-sosyodad kag pagbulig sa nagakinahanglan.
Pila sa mga topiko nga mangin sentro sang assembly amo ang The National Situationer on the West Philippine Seas nga ipatpat ni University of the Philippines Institute on Maritime Affairs and Law of the Sea director, Prof. Jay Batongbacal.
Ipaathag naman ni Simbahang Lingkod ng Bayan executive director Karlo Abadines ang Role of Philippine Church in Politics.
Magapakigbahin man sanday Department of Energy Usec. Felix William Fuentebella kag Center for Energy, Ecology, and Development executive director Gerry Arances tuhoy sa The Philippine Energy Situation.
Ang tema subong nga tuig amo ang “Social Action Network: Journeying to Empower Communities in Faith, Love, and Justice”.
Nagsugod ang assembly sang 1969 kag nagatuyo nga tipunon ang mga directors kag representatives sang social action centers sa Pilipinas.
