Nagpanawagan ang 43 ka mga pungsod nga magpatigayon sang independent international investigation sa hinali kag kontrobersyal nga kamatayon sang opposition leader sa Russia nga si Alexei Navalny.
Ini nga panawagan ang ginpangunahan ni European Union ambassador Lotte Knudsen sa United Nations Human Rights Council sa Geneva bilang tiglawas sa 27 ka European Union states kag 16 ka iban pa nga mga pungsod lakip na ang Canada, United Kingdom, Estados Unidos sang Amerika, Ukraine, Britain, Australia, New Zealand kag Norway.
Nahibaluan nga si Navalny, 47, amo ang pinakamatunog nga kritiko ni Russian President Vladimir Putin.
Napatay ini sang Pebrero 16 matapos ginpahayag nga hinali lang ini nga natumba sa sulod sang presuhan — baliskad sa pagpati sang iya supporters nga hungod ini nga ginpapatay.
Una naman nga nagpanginwala ang Kremlin nga may kahilabtanan ang estado sa kamatayon sini.
Sa pihak nga bahin, ang Investigative Committee sang Russia ang nagkumpirma nga naglunsar na ini sang procedural investigation sa amo nga hitabo.#
