Masobra katunga sang mga Pinoy ang nagapati nga dapat magkooperar ang gobyerno sang Pilipinas sa imbestigasyon sang International Criminal Court (ICC) sa mga pagpamatay sa idalom sang war on drugs sang anay Duterte administration.
Sandig sa resulta sang survey sang OCTA Research nga ginsapubliko subong nga Domingo, Pebrero 18, 55% sang adult Filipinos ang nagapabor, samtang 45% naman ang nagapamatok sa paghatag sang suporta sa imbestigasyon sang ICC nga naka-base sa The Hague, Netherlands.
Suno sa survey, ang may pinakamataas nga nagapabor amo ang Balance Luzon nga may 65% samtang ang pinakamanubo naman nga naghatag sang suporta amo ang Mindanao nga may 42%.
Sa Bicol Region ang may highest approval sa kooperasyon nga may 79% samtang ang rehiyon naman sang Davao — hometown ni anay Presidente Rodrigo Duterte — ang naghatag lamang sang sais porsyento nga suporta.
Kun lantawon naman ang gender, pulu-pareho lang ang percentage sa mga babayi kag lalaki nga naga-pabor sa sini nga ideya: 56% sa mga babayi kag 55% sa mga lalaki.
Ginpatigayon ang survey sang nagligad nga Disyembre 10-14, 2023 gamit ang face-to-face interviews sa 1,200 ka Filipino adults nga may margin of error nga ±3% para sa national percentages kag ±6% para sa regional breakdowns.
Sandig sa opisyal nga numero, masobra 6,000 ka mga tawo ang ginpangpatay sa idalom sang war on drugs sang Duterte administration apang kun lantawon ang pahayag sang human rights groups, nagalapaw sa 30,000 ang numero sang nagkalamatay.#
