ILOILO CITY – Makaeksperyensya sang power interruption ang mga konsumidor sa pila ka mga distrito sa syudad sang Iloilo 12:00 karon sa tungang gab-i tubtob 6:00 sa kaagahon.
Ini ang may kaangtanan sa scheduled annual preventive maintenance nga patigayunon sang Panay Power Corporation (PPC), isa sa mga suppliers sang kuryente sang MORE Electric and Power Corporation (MORE Power).
Sa interview sang Bombo Radyo kay Engineer Bong Espanta, assistant vice president kag plant manager sang Panay Power Corporation, iya ginpahayag nga nag-deploy sila sang tanan nga mga personnel agud masapar ang maintenance sa sulod sang anum ka oras.
Base sa anunsyo sang MORE Power, ang mga apektado nga substations ukon feeders amo ang yara sa Iloilo City Proper, Mandurriao, Molo, Mandurriao, Megaworld, Jaro Substation, kag Lapaz Feeder 4.
Bangud sini, mangin apektado ang mga konsumidor sa bilog nga distrito sang Mandurriao, Molo kag Arevalo kag portion sang distrito sang Iloilo City Proper, Lapaz kag Jaro.Magluwas sa MORE Power, mangin apektado man ang ILECO I.
Magluwas sa Pebrero 14 nga schedule, may preventive maintenance man nga patigayunon sa Pebrero 20 kag 21 kag apektado man gihapon ang duha ka nasambit nga power distributors.
Ginpaathag sang natungdan nga napilian ang graveyard schedule (12:00 midnight – 6:00 AM) bangud ini ang tion nga manubo ang electrical load.
