Magapatigayon ang 604th Community Defense Center (CDC) sang Grand Mustering kag Constructive Assessment and Development Review Engagement (CADRE) sa Iloilo Science and Technology University (ISAT U)–La Paz Campus sa Nobyembre 21.
Sa interview sang Bombo Radyo kay Col. Michael Asuncion sang Philippine Army Reserve Command (RESCOM), Director sang 604th Community Defense Center (CDC) sa idalom sang 6th Regional Community Defense Group (6RCDG), iya ginpahayag nga paagi sa nasambit nga mga aktibidad, i-assess ang personnel readiness, capabilities kag skills sang mga miyembro sang reserve force.
Pangunahan sang 3rd Infantry Division sang Philippine Army ang aktibidad.
Suno kay Asuncion, importante ang pagpatigayon sang CADRE, ilabi na nga yara sa tunga sang indi mapaktan nga sitwasyon ang seguridad sa pungsod gani ano man nga oras, mahimo nga kinahanglanon ang kahandaan sang mga reservists.
Sa subong suno kay Asuncion, padayon ang 604th CDC sa pag-engganyo sa publiko nga mag-upod sa Philippine Army Reserve Force.
Nahibalunan nga ang mga ROTC graduates ang automatic nga kabahin sang standby reserve bangud may ara na sila sang serial number halin sa Armed Forces of the Philippines (AFP).
Bukas man ang recruitment para sa iban nga indibidwal nga luyag mangin miyembro sini.
Ginpasalamatan man ni Asuncion ang Bombo Radyo sa padayon nga suporta kag bulig sa ila recruitment campaign, bangud suno sa iya, daku ang kontribusyon sang estasyon sa pag-engganyo sang publiko nga mag-upod sa Philippine Army Reserve Force.
Suno pa sa iya, halin sang ginpaathag sa publiko paagi sa Bombo Radyo ang oportunidad nga mangin reservist, nagdamo ang mga indibidwal nga nagpakita sang interes nga magpamiyembro.
May yara man sang masobra 50 ka mga nagpartisipar sa ila ginpatigayon nga Basic Citizen Military Training, nga ang kadam-an sa mga partisipante halin sa Iloilo.
