Gin-activate na sang 61st Infantry Battalion ang ila Hunter Emergency Action Response Team (HEART) bilang preparasyon sa pagresponde sa mga maapektuhan sang Bagyo Tino.
Sa interview sang Bombo Radyo kay Lt. Col. Jekyll Julian Dulawan, Commanding Officer sang 61st IB, iya ginpahayag nga naka-standby ang mga suldado para sa search and rescue, relief distribution, pag-rescue sa mga stranded sa baha, kag iban pa nga kinahanglanon sang mga apektado.
Nakapreparar naman ang military ambulance, trucks, kag iban pa nga mga kagamitan.
Ang HEART sa idalum sang pagdumala ni Lt. Col. Dulawan nagakoordinar sa mga Local Government Unit (LGU), Office of Civil Defense, kag iban pa nga ahensya para sa organisado nga pagpangaman.
Ginpahanumdom man nila ang publiko nga magpabilin nga alerto, magsunod sa mandu sang otoridad, kag mag-monitor sang opisyal nga weather updates.
Dugang pa ni Lt. Col. Dulawan, nagahiwat man sila sang training sa water search and rescue kag first aid para sa local volunteers kag barangay tanod sa Iloilo kag Antique, agud mapabakod ang kapasidad sang pumuluyo sa pagresponde sa kalamidad.
