Isa na gid lamang ka Pinoy ang nagapabilin sa Gaza.
Suno sa Department of Foreign Affairs (DFA), ini amo ang madre nga nag-desisyon nga magapabilin sa amo nga teritoryo sa Palestine apisar pa nga ginsakop na ini sang Israel kag wala na sang hilway nga palanaguan sa amo nga area.
Suno pa kay Foreign Affairs Undersecretary Eduardo de Vega, may 14 ka latest Filipino evacuees nga naghalin sa Gaza kag pagadal-on sa Cairo sa Egypt kun sa diin pagabuligan sila sang Philippine Embassy agud nga mapapauli diri sa Pilipinas.
Bangud sini nga bag-o nga evacuees, 136 na sa 137 ka mga Pinoy ang nakabiya sa Gaza.
Sang 2023 pa lamang, na-report na sang DFA nga ini nga madre sang Missionaries of Charity ang nagapangindi sa paghalin sa Gaza.
Wala ini ginhingadlan apang ginpahayag nga naga-edad ini sang 63-anyos.
Una man nga ginpahayag ni De Vega nga indi maghalin ang Missionaries of Charity sa Gaza apisar sang gyera bangud nagapati sila nga spiritual ang ila nga ginahimo.
Ginsiling man nga ang madre ang simbolo sang Filipino spirituality kag kun paano nagapangamuyo ang mga Pilipino para sa mga tawo nga naga-antos amo man para sa kalinong.#
(Photo: [Said Khatib/AFP])
