May equipment apang napalpak ang sistema.
Ini ang isa sa mga ginapahayag nga rason kun ngaa sa baylo nga himuon nga testing center, nahimo nga impounding area sang daan kag guba nga mga salakyan ang Motor Vehicle Inspection Center (MVIC) nga nahamtang sa San Miguel, Iloilo.
Sa interview sang Bombo Radyo kay anay Land Transportation Regional Director Gerard Camiña, iya ginpahayag nga sang tion pa niya sa LTO, gintukod na ang amo nga center agud kuntani umpisahan ang computerized kag automated nga inspeksyon sang mga salakyan para sa ginatawag nga ‘roadworthiness’.
Suno kay Camiña, yara na kuntani ang mga equipment apang indi man maduso ang pag-umpisa sang operasyon bangud wala sang ‘connectivity’.
Paathag sang anay regional director, sa idalom sang MVIC system, kun magparehistro ukon mag-renew sang rehistro ang isa ka tag-iya sang salakyan, kinahanglan nga ipasa ang test result halin sa center padulong sa LTO nga wala sang human intervention.
Ini nga plano ang wala nahatagan katumanan bangud sa ginapahayag nga problema sa kontraktor.
Makaligad ang pila ka tuig, wala gihapon naduso ang MVIC kag suno kay Camiña, WALA GID NAGAMIT halin sang una.
Isa pa sa ginalantaw rason kun ngaa wala na nadugangan ang MVICs sa rehiyon amo ang kakulang sa pondo.
Suno kay Camiña, sa subong, masobra na sa 20 ang extension offices sang LTO sa Western Visayas kag kun kinahanglan ang kada MVIC sa kada extension office, daku man nga kwarta ang kinahanglanon.
Ini posible suno sa iya ang rason kun ngaa gintugyan na ang MVIC sa private investors.
Sa una nga pagpakig-angot sang Bombo Radyo sa LTO Region VI, ginpahayag ni Atty. Allan Sacramento, legal counsel kag chief sang operations division sang talatapan, nga indi pa sigurado kun ipaidalom sa rehabilitation ang center sa San Miguel.
Kun madesisyunan sang LTO nga ipaidalom sa rehabilitation ang amo nga MVIC, ginabanta indi magnubo sa P35 million ang ipain nga budget para diri.
