Makapatindog na sang bag-o nga balay kag makabakal sang bastante nga bulong ang isa ka 83-anyos nga Lola matapos napilian bilang grand prize winner sang One Two Panalo Part 19 Promo sang Bombo Radyo kag Star FM.
Si Alicia Caba, residente sang Purok Magbinuligay, Barangay Bata, Bacolod City, ang tagdaug sang P1 million — ika-72 nga miyembro sang Bombo Millionaire’s Club.
Sa interview sang Bombo Radyo kay Caba, iya ginpahayag nga pangamuyo lang gid kag maukod nga paghulog sang entries ang iya nangin sekreto kun ngaa siya ang nagpangibabaw sa tanan nga promo participants.
Tigulang na kag madamo sang ginabatyag sa lawas si Caba apang siya man gihapon ang nagaatipan sang iya isa ka anak nga may balatian man sa lawas. Ang tatlo sa iya iban pa nga kabataan ang wala man nagatinir sa Bacolod.
Suno kay Caba, masami nga perwisyo sa ila sang iya anak ang busluton nga bubong sang balay.
Magluwas diri, indi pa ila lote ang ginatindugan sang ila nga balay. “Nagsinggit gid ako sa kalipay kay ako ang nagdaug. Pangamuyo lang gid,” malipayon nga pahayag ni Caba.
Magluwas kay Caba, nagdaug man sang P50,000 nga regional prize para sa Visayas si Kathline Labrador, 54, residente sang Jereos Extension Road, La Paz, Iloilo City.
May yara man sang tag-isa ka regional prize winner (P50,000) sa National Capital Region, Luzon, kag Mindanao.
May yara man sang guaranteed prize winners para sa area sang Bombo Radyo Iloilo kag Star FM Iloilo:
– Nancy Cañonaso, 60, sang Isian Norte, Leon, Iloilo nga nagdaug sang P5,000
– Liovel Neri, 47, sang Bantud, Dumangas, Iloilo nga nagdaug sang P10,000
– Dolores Allin, 75, sang Rizal St., Alimodian, Iloilo nga nagdaug sang P15,000
Ang One, Two, Panalo Part 19 promo sang Bombo Radyo kag Star FM ang naga-isahanon nga promo sa radyo sa tunga sang krisis sa ekonomiya bangud sa COVID-19 pandemic.
