ILOILO CITY — Ginabanta naglab-ot sa 17 ka trucks sang mga basura ang natipon sa highlight lamang sang dinagyang Festival kahapon sa city proper area lamang.
Sa exclusive interview sang Bombo Radyo kay Engr. Neil Ravena sang General Services Office (GSO), ginpahayag sini nga posible pa ini nga magtaas gani indi pa ini makapagwa sang kabug-osan nga total base sa tonelada sang basura.
Ginbudlayan naman ang GSO sa pagkarga sang mga paklang sang lubi ukon niyog nga amo ang gingamit sang iban nga kiosk owners bilang atup ukon dibisyon sang ila mga kiosko.
Nagkinahanglan pa nga maggamit ang GSO sang mga open dump trucks tungod indi makaigo sa mga compactors ang mga paklang.
Samtang gilayon naman nga ginbutangan sang GSO sang bio-enzymes ang mga lugar nga ginpahamtangan sang mga portalets agud makuha ang pangsot kag indi na ini magtuga pa sang hu-ol sa mga umalagi.