ILOILO CITY — Pagatututkan sang Department of the Interior and Local Government (DILG) ang mga pamilya sa mga barangay bilang pagpadayon sang kampanya batok sa iligal nga druga.
Sa exclusive interview sang Bombo Radyo kay DILG Secretary Ismael Mike Sueno, ginpahayag sini nga magabutnag ang DILG sang mga drug-free stickers sa mga balay agud mas madasig nga matumod ang mga balay sang pushers kag users.
Mangin mas epektibo ini suno sa Ilonggo nga tiglikom kaysa sa una na nga ginpatuman nga Oplan Tokhang sang Presidente matapos nga ginagamit lamang sang mga police scalawags sa ila kaugalingon nga interes.
Dugang pa ni Sec. Sueno ang mga may drug-free stickers nga pamilya ang magabulig sa ila mga tupad balay nga apektado sang iligal nga druga agud magbag-o na kag ma-rehabilitate kung user, kag magkumbinse sa mga ini nga magsungka nalang sa otoridad kung pusher.
Ginalauman ni Sueno nga halin sa lebel sang pamilya, magasaka ini sa lebel sang komunidad tubtob sa probinsya sa diin mangin mas madamu naman nga lugar ang mangin drug-cleared na sang Police kag PDEA.