ILOILO CITY — Nagapangatubang sang tatlo ka kaso nga administratibo sa National Police Commission (NAPOLCOM) Region 6 ang Hepe sang Police Station Number 1 sang Iloilo City Police Office matapos ginpetisyunan sang mga tinawo sini.

Sa interview sang Bombo Radyo kay NAPOLCOM 6 Information Officer Allen Camiring, kaso nga Grave Misconduct, Conduct Unbecoming kag Oppression ang ginapangatubang ni Lamera.
Ang complaint batok kay PCI Lamera ang nabaton sang NPOLCOM sang February 9, 2017 kalakip sang petisyon sang mga tinawo sini sa PP1.
Si Lamera ang ginreklamo nga nagapamuyayaw sa kada magpatawag sang conference kag nagapamahog pamahog sa mga tinawo nga hatagan ang mga ini sang manubo nga grado sa individual performance report.
Ginreklamo man si Lamera sang pagpangrelieve sang mga personnel nga wala nagasunod sa nagakaigo nga proseso kag pagpaguba sang pwertahan kag door knob sang opisina sang crime registrar sang PP1.
Nagpanindugan batok kay Lamera ang Non-Uniformed Personnel (NUP) nga si May Flor A. Fernandez kag ginsuportahan man sang 32 ka mga police personnel nga assigned sa PP1 nga nagpirma sa petisyon.
Ipatawag naman sang NAPOLCOM si Lamera agud pasabton sa isyu.