LP senators, wala na ginkakibot ang pagkakas sang ila committee chairmanship

ILOILO CITY – Wala na ginkakibot ni Liberal Party (LP) president Senator Francis “Kiko” Pangilinan ang pagkakas sang ila committee chairmanship sa Senado.
Sa exclusive interview sang Bombo Radyo kay Pangilinan nga amo ang pinuno sang minority bloc sa Senado, ginpahayag sini nga matapos nga ginpaaresto sang Duterte administration si Sen. Leila de Lima, ginalauman na nila nga sila naman ang masunod.
Gin-athag man sang senador nga indi matuod nga wala sila nagahimo sang ila katungdanaan gani ginkakas sila sa ila committee chairmanships.
Suno sa senador, 70 percent sang mga hagna sa Senado ang ginduso sang mga miyembro sang minority.
Nagapati naman si Pangilinan nga pila sa mga rason sa pagkakas sang ila committe chairmanship amo ang ila pagsuporta sa imbestigasyon sa extrajudicial killings (EJK), kag pag-imbestigar sa kurapsyon sa Bureau of Immigration kag pagpamalabag sa death penalty.
Ginapanan-aw naman sini nga posible pasakaan man sila sang kaso sang Duterte administration.
Nahibaluan nga ginkakas bilang Senate President Pro Tempore si Sen. Franklin Drilon, samtang si Pangilinan ang gin-islan man bilang chairman sang Committee on Agriculture, Sen. Bam Aquino sa Committee on Education kag Sen. Risa Hontiveros bilang chairperson sang Senate Committee on Health.