Probinsiya sang Iloilo nakaalerto sa posible pag-atake sang NPA

ILOILO CITY – Nakaalerto ang Iloilo Police Provincial Office (IPPO) bangud sa ginapahayag plano nga pag-atake sang mga katapo sang rebelde nga New People’s Army sa mga planta sang kuryente kag kalamay sa probinsya sang Iloilo.
Santo sa intelligence information sang mga otoridad, plano nga atakehon sang mga rebelde ang Central Azucarera de San Antonio sa boundary sang Brgy. Cadilang, Passi City kag Brgy. Punong Grande, Dueñas, Iloilo; Universal Robina Corporation sugar central sa Brgy. Imbang Pequeño, San Enrique kag Salcon Power Corporation sa Brgy. Tabugon, Dingle, Iloilo.
Sa interview sang Bombo Radyo Iloilo, ginpahayag ni Police Chief Inspector Aron Palomo, tagpamaba sang IPPO, ginmanduan na sini ang mga munisipyo sa probinsya sang Iloilo nga mag-alerto batok sa mga rebelde.
Ginkumpirma ni Palomo nga may nakit-an nga posible mga miyembro sang NPA sa Passi City.
Ginkilkilan man sang ginapatihan mga miyembro sang NPA ang lima ka mga pamalay sa Brgy. Garita, San Enrique, Iloilo.
Suno kay Palomo, nagpalab-ot sang impormasyon si San Enrique Mayor Trixie Fernandez nga ginsaka sang lima ka mga rebelde ang pamalay sang iya mga residente.
Ang mga balay ang ginapanag-iyahan nanday Rodolfo Alemania Jr., Emilano Gonzales, Etsel Gonzales, Orlando Deviza kag Maribeth Deviza.
Nagpangayo ang mga rebelde sang bugas, de-lata kag kwarta.