ILOILO CITY – Nauntat ang championship game sa tunga sang Hua Siong High School kag Sta. Clarita International School sa Private Schools Athletic Association (PRISAA) matapos maaksidente ang Batang Gilas Nominee kag Palarong Pambansa 2016 crowd favorite na si Mark Nonoy.
Sa interview sang Bombo Radyo kay Coach Bing Conlu sang Hua Siong High School, intentional hard foul ang gin-obra sang player sang Sta. Clarita International International School nga si Bryan Sajonia samtang nagalay-up ini rason sang iya pagka-out balance kag pagkatukod sang iya kamot.
Nadislocate gid ang kamot ni Nonoy nga gilayon gindala sa ospital.
Ginpauntat naman ang hampang matapos ang aksidente tungod man sa naga-init nga crowd reactions kag pagpetisyon batok sa Sta. Clarita international School Basketball Team nga naulamid man sa physical nga hampang batok sa St. Roberts International School kahapon sa diin na-injure man ang star player sang team.
Si Mark Nonoy nga may tumalagsahon nga abilidad sa basketball ang ginakabig nga isa sa mga future stars ng Philippine Basketball sa diin naimbitahan na ini nga maghampang sa Batang Gilas subong nga tuig kag ginkabig nga crowd favorite sa 2016 Palarong Pambansa nga ginhiwat sa Legazpi City Albay sang Abril.
