ILOILO CITY – Nagapati si Iloilo City Lone District Congressman Jerry Treñas nga hungod nga ginsabotahe ang ila grand rally sa Mandurriao Plaza,Iloilo City.
Ini matapos nga napatyan sila sang suga samtang ginapatigayon ang ila campaign rally.
Sa interview sang Bombo Radyo Iloilo kay Treñas, iya ginpahayag nga hana na kuntani sila nga magahambal sa tunga upod sanday Vice-mayor Jeffrey Ganzon kag former city councilor Jamjam Baronda sang napatay ang suga kag ang public address system.
Suno kay Treñas, katingalahan nga sa plaza lang napatyan sang suga apang nagasiga naman ang tanan nga establisyemento sa palibot.
Dugang pa ni Treñas,sa iya pagkahibalo, yara ang switch sang suga sa plaza sa barangay hall sang Oñate, Mandurriao nga ginapamunuan ni Punong barangay Willy Colon nga kilala nga kaalyado ni Mayor Joe III Espinosa nga kasumpong ni Treñas sa pagka-alkalde sa syudad sa May 13 midterm elections.
