ILOILO CITY – Gintun-an pa sang kampo ni anay Department of Health (DOH) Sec. Janette Garin kag sang iya mga kaupod nga medical expert ang pagpasaka sang kaso batok kanday Public Attorney’s Office (PAO) Chief Atty. Persida Acosta kag Dr. Erwin Erfe sang forensics laboratory sang PAO.
Ini ang may kaangtanan sa pagpasaka sang kaso sang PAO batok kay Garin kag sa iya mga kaupod nga medical experts nga naangot sa Dengvaxia controversy.
Sa exclusive interview sang Bombo Radyo kay Sec. Garin, iya ginpahayag nga sa subong, indi pa siya makadesisyon bangud nga masako pa siya sa pagpangampanya para sa May 13 midterm elections.
Ginpahayag man ni Sec. Garin nga padayon ang pagpakighinun-anon nila sang iya mga kaupod nga medical experts kun ano ang ila legal action batok kanday Acosta kag Erfe.
Ginpahayag sang anay tiglikum nga indi malayo nga ila nga pasakaan sang kaso ang duha bangud sa pagguba sang vaccination program sang DOH.
Sa ginhimu nga pagpatalang sang PAO suno sa natungdan, nangin lapnagon ang balatian nga tipdas kag dengue sa Pilipinas sa mga nakaligad nga tuig bangud nga ang mga tawo ang nahadlok na nga magpabakuna.
