ILOILO CITY – Igapaidalom sa ‘testing and sealing’ ang 388 ka Vote Counting Machines (VCMs) kag 388 Voter Registration Verification Machines (VRVM) para sa syudad sang Iloilo.
Suno kay City Commission on Elections (Comelec) Officer Atty. Mavil Majarucon Sia, buwas nga adlaw, Mayo 10, natalana ang ‘testing and sealing’ sang mga VCM kag VRVM.
Katuyu-an sini suno kay Atty. Sia amo nga mahibalu-an kun bala wala sang guba ang mga VCM kag VRVM machines nga pagagamiton sa eleksyon.
Sa pagpaathag ni Atty. Sia, ang VRVM machines ang pagagamiton sa pagtumod kun bala ang isa ka botante ang registered voter sa nasambit nga clustered precinct.
Pagkatapos sang verification process, may yara sang resibo nga iga-print ang VRVM kag ang nasambit nga resibo ang igapakita sang botante sa chairman sang election board.
Ang resibo nga iga-print sang VRVM ang mangin liyabe agud nga mahatagan sang balota ang botante kag pagkatapos sang pagboto sa nahamut-an nga pulitiko, ang balota ang igaguro sa VCM.
Kadungan sini, ginpasalig ni Atty. Sia nga may yara sang ginbayaran nga technical support staff para sa VCM kag VRVM.
