ILOILO CITY– Nagpangibabaw ang kinaadman kag ikasarang sang isa ka Ilongga nga estudyante matapos nga gintiglawas ang Pilipinas sa isa international research competition.
Sa interview sang Bombo Radyo kay Maria Isabel Layson, 16 anyos, estudyante sang Iloilo National High School kag residente sang Brgy. North Fundidor, Molo, Iloilo City, iya ginpahayag nga ang iya pagtuon ang may kaangtanan sa pagtukib sang anti diabetic properties kag anti-oxidant levels sang ‘Sarisa’ ukon Artiles agud mangin ‘regulator’ sang type II diabetes.
Suno kay Layson, indi lang ang bunga sang Sarisa ang mapuslan kundi mismo ang gamot ukon ugat, sanga, kag hulak sini ang may yara man sang pulos.
Madamo naman sang nagatubo nga Sarisa sa ila ugsaran kag sa higad sang dalan apang wala ini ginasapak rason nga iya naisipan ang pagtukib sa kun ano ang mahimo nga pamaagi agud magamit ang sarisa sa patag sang medisina.
Duha naman ka bulan ang iya ginhimo nga pagtuon kag nangin dako nga pagpanghangkat sa iya ang pagpangita sang institusyon nga makabulig sa iya pagtuon.
Isa sa nangin inspirasyon ni Layson amo nga may yara sang sulundon nga Diabetes ang iya pamilya.
Nangin masadya naman ang International Science and Engineering Fair nga ginpatigayun sa Phoenix Arizona, USA suno kay Layson bangud may yara sang halos 1,840 ka mga delegado gikan sa 80 ka pungsod kag ini ang labing una niya nga kahigayunan nga nakapasakop sa nasambit nga kompetisyon.
Nahibaluan nga isa si Layson sa 12 ka delegado nga nagtiglawas sang Pilipinas sa nasambit nga kompetisyon.
