ILOILO CITY – Nagataas ang kaso sang Dengue sa syudad sang Iloilo subong nga tuig ipanggid sang 2018.
Sa interview sang Bombo Radyo kay Dr. Bernard Caspe, pinuno sang City Health Office, iya ginpahayag nga humalin sang Enero 1 tubtub Hunyo 3, 2019, nagdangat na sa 500 ang kaso sang Dengue kag mahimo pa nga madugangan ilabi na nga naga-umpisa na subong ang pag-ulan.
Sa 500 ka Dengue cases, 4 diri ang patay sa diin isa ang naghalin sa distrito sang Molo, duha sa Jaro kag isa sa Lapuz.
Sang 2018 suno kay Caspe, naglab-ot lamang sa 883 ang kaso sang Dengue sa syudad.
Sa subong, hugot ang kampanya sang Department of Health (DOH) sa pagpatuman sang 4S batok sa Dengue nga ginalakipan sang Search and destroy mosquito breeding places, Secure self-protection, Seek early consultation kag Support fogging/ spraying.
