ILOILO – Indi interesado si anay Provincial Administrator kag incoming Concepcion, Iloilo Mayor Dr. Raul Banias nga mangin presidente sang League of Municipalities of the Philippines (LMP) – Iloilo Chapter.
Sa interview sang Bombo Radyo kay Dr. Banias, iya ginpahayag nga tuman ang iya pagpasalamat bangud nga isa siya sa ginapili-an nga mangin masunod nga presidente sang LMP sa Iloilo.
Bangud nga ini ang labing una nga kahigayunan ni Dr. Banias nga mangin alkalde sa nasambit nga banwa, ginpahayag sang natungdan nga luyag niya nga mag-focus sa panghimanwa sa ila lugar.
Ginpasalamatan ni Dr. Banias ang mag-amay nga sanday outgoing Iloilo Gov. Arthur Defensor Sr. kag incoming Iloilo Gov. Arthur ‘Toto’ Defensor Jr. sa pagtib-ong sa iya agud nga magpamuno sa LMP.
Sa iya bahin, ginpahayag sang natungdan nga indi pa siya makadesisyon kun sin-o ang iya pagasuportahan bilang masunod nga LMP-Iloilo Chapter president.
Nahibalu-an nga una na nga ginpahayag ni Alimodian, Iloilo Mayor Gefree ‘Kalay’ Alonsabe nga iya nga igahatag sa iban nga alkalde ang kahigayunan nga magpamuno sa LMP samtang indi pa makahatag sang sabat sa subong si Ajuy, Iloilo Mayor Jet Rojas kun magapadalagan ukon indi para sa nasambit nga posisyon.
