Ginapaalerto sang Office of Civil Defense (OCD) ang publiko may kaangtanan sa posible pagluntad sang aqno man nga sahi sang kalamidad kadungan sang pag-obserbar sang National Disaster Resiliency Month subong nga Hulyo.
Sa interview sang Bombo Radyo Iloilo kay OCD Regional Director Roberto Nuñez, iya ginpahayag nga importante nga mahibaluan sang mga pumuluyo ang ila dapat himuon sa tion nga may magluntad nga landslide,baha,kag ano man nga kalamidad nga makahalalit.
Suno kay Nuñez, dako man ang pagatungdan nga papel sang mga Local Government Units agud ma-edukar ang ila mga pumuluyo may kaangtanan sa disaster resilience.
Importante man suno kay Nuñez ang pagpamati sa balita agud mangin updated sa dalagan sang panahon.
Samtang, gin-imbitar man sang opisyal ang publiko nga mag-upod sa mga aktibidad may kaangtanan sa pag-obserbar sang National Disaster Resilience Month nga nagkick-off subong nga adlaw.
Pila sa mga aktibidad nga patigayunon sang OCD ang Bike-for–Resilience sa Guimaras sa Hulyo 7 kag exhibit of capability equipment sa Hulyo 13.
Patigayunon man ang isa ka forum nga tambungan sang mga local chief executives, planning officers, kag iban nga concerned offices agud hatagan sila sang kahigayunan nga mapalab-ot ang ila concerns tuhoy sa local disaster risk reduction and management plan.
