Nagpangayo na sang bulig si Iloilo Governor Arthur Defensor Jr. sa mga pribado nga ospital sa Syudad sang Iloilo may kaangtanan sa nagataas nga numero sang mga pasyente nga may dengue sa probinsya sang Iloilo.
Sa interview sang Bombo Radyo Iloilo kay Governor Defensor, iya ginpahayag nga nagsaka na sa 851 ka kaso sang dengue ang narecord sa probinsya kag ginalauman nga magsaka pa ini.
Suno sa gobernador, indi bastante ang mga district hospitals agud akomodoran ang amo ka damo nga mga pasyente bangud sa limitado lang nga kapasidad sang mga ini.
Ginpahayag ni Defensor nga sa ginpatigayon nga pagsinapol upod sa mga hospital administrators, nagpasugot ang mga ini nga saluon ang mga pasyente nga indi na maakomodar sang mga district hospitals sa probinsya.
Sa subong, suno sa natungdan, kabahin man sang pagpanghanda sang probinsya ang pagdugang sang mga tawo ukon medical staff sa district hospitals, pagpanghulam sang mga tents para tiniran sang mga pasyente nga indi maakomodar sa sulod sang ospital.
Samtang gindugang man sang gobernador nga sa tunga sang dengue outbreak sa probinsya,indi pa kinahanglan nga magdeklarar sang state of calamity apang wala niya ginasirado ang posibilidad sang nasambit nga deklarasyon.
