ILOILO CITY – Padayon pa nga imbestigaran sang otoridad ang natabo nga shooting incident sa City Time Square sa Brgy. San Rafael, Manduriao, Iloilo City.
Ini ang kasunod sang pagkapilas sang duha ka mga biktima nga sanday Erickson Talingdan, 40, sang Brgy. Ususan, Taguig City kag temporaryo nga nagatinir sa Brgy. Bolilao, Mandurriao, Iloilo City kag Ronald Chung, legal ang edad sang Binondo, Manila kag temporaryo nga nagatinir sa Brgy. Tabucan, Mandurriao, Iloilo City.
Sa interview sang Bombo Radyo kay Police Major Marlon Valencia, hepe sang Mandurriao Police Station, iya ginpahayag nga nakabaton sila sang tawag halin sa isa ka security guard nga may kinagamo kag shooting incident sa isa ka shopping mall sa Brgy. San Rafael.
Gilayon nga nagresponde ang mga pulis kag sa ila nga pag-abot sa area, wala sang recoveries nga nakita kag daw kasubong nga wala sang may natabo nga kinagamo.
Pagkaligad sang 30 minutos, nakabaton naman ang Mandurriao PNP sang tawag halin sa isa ka pribado nga hospital nga may yara sang ginluthang nga duha ka lalaki kag natukiban nga ang mga biktima ang natiruhan sa Brgy. San Rafael.
Santo sa panaysayon sang isa sa mga biktima, nagtabok siya sa dalan agud nga magpangihi apang nasaga-iran siya sang motorsiklo nga ginasakyan sang mga suspek.
Natumba ang motorsiklo rason nga may natabo nga komosyon kag naka-angkon sang pilas sa tiyan si Chung samtang may duha naman ka pilas sa lawas si Talingdan.
Wala na makilala ang mga suspek bangud nga madulom kag wala sang Closed Circuit Television camera sa lugar.
