LAMBUNAO,ILOILO– Nagakasubo ang bilog nga Lambunao National High School sa pagkapatay sang apat ka mga manunudlo sang eskwelahan sa pagkulob sang MB Jenny Vince sa kalalawran sa tunga sang Iloilo kag Guimaras.
Ang mga manunudlo ginkilala nga sanday Ma.Zeny Anilao,Lynlyn Janolino, Ivy Grace Labordo kag Maria Emilie Legarda nga nakasakay sa motor banca padulong sa Iloilo gikan sa Buenavista,Guimaras.
Sa interview sang Bombo Radyo kay Maam Luda Ahumada, Principal sang Lambunao National High School iya ginpahayag nga nagakalisod sa subong ang bilog nga eskwelahan sa natabo sa apat ka manunudlo nga iya ginlaragway lunsay maayo kag mabuot.
Suno kay Ahumada tinguhaan sang eskwelahan nga makahatag sang bulig pinansyal sa pamilya sang mga napaslawan nga manunudlo.
Dugang pa ni Ahumada nagapakig-angot sila sa subong sa himata sang mga napatay agud istoryahan ang plano nga pagpatigayon sang isa ka gab-i kag isa man ka adlaw nga prayer vigil para sa mga manunudlo kun sa diin ihaya sa eskwelahan ang ila nga bangkay.
Naka half mast naman ang hayahay sang pungsod sa eskwelahan patimaan sang pagpangasubo sang buluthuan.
Samtang emosyonal naman nga gin saysay ni Maam Ruth Caguing co-teacher kag Coordinator sang Filipino department sang nasambit man nga eskwelahan ang nangin ulihi nga pag upod nila sang apat ka napatay nga manunudlo nga parte sang ila departamento.
Suno kay Caguing dako ang nadula sa ila nga departamento bangud lunsay maayo kag mabuot gid nga mga manunudlo ang apat ka mga napatay.
Nahibaluan nga isa sa apat ka manunudlo ang Head sang Filipino Department nga si Maam Maria Emilie Legarda ang kaupod man sa nagkulob nga motor banca.
Dugang pa ni Caguing nangin masadya ang nangin ulihi nila nga pag-updanay kun sa diin ululupod pa sila nga nagkaon matapos ang isa ka event sa ila eskwelahan kag nag-upod pa sila sa pagsinapol nga ginpatigayon sang ila departamento para sa palaabuton nga Buwan ng Wika.
Nagahilibion nga ginpahayag ni Caguing nga tubtob subong daw sa indi pa nila mabaton ang pagkadula sang apat ka mga manunudlo nga ginakabig na nila pamilya kag abyan.
