ILOILO CITY – Naka-alerto ang Iloilo City Police Office sa posibilidad nga maka-abot sa syudad sang Iloilo ang martilyo gang nga nag-atake sa Bacolod City.
Ini ang kasunod sang pagpangawat sa duha ka jewelry store sa Gaisano Grand Mall sa diin P4.5 million nga balor sang alahas ang nakawat.
Sa interview sang Bombo Radyo kay Police Col. Martin Defensor Jr., Director sang Iloilo City Police Office, iya ginpahayag nga wala pa man makalab-ot sa syudad sang Iloilo ang martilyo gang nga ginapahayag naghalin sa Ozamiz City apang nabase na subong sa Negros Occidental.
Suno kay Defensor, iya na nga ginpaalinton sa tagsa ka station commander nga mag-alerto kag pasangkaron ang police visibility sa syudad sang Iloilo.
Magluwas diri, ginpahayag ni Defensor nga iya naman nga ginpaalinton ang mga tagdumalahan sang mga jewelry store, bangko kag iban pa nga high risk commercial establishment nga magpahamtang sang functional nga Closed Circuit Television kag magpahamtang man sang mga security personnel sa palibot agud nga indi masalisihan sang kawatan.
