ILOILO CITY- Tatlo ka dalagko nga mga infrastructure projects ang ginalauman nga magasulod sa Syudad sang Iloilo subong nga tuig 2019 kag 2020.
Sa interview sang Bombo Radyo kay Iloilo City Councilor Ely Estante, chairman sang Committee on Infrastructure sa Iloilo City Council, iya ginpahayag nga bilyones pesos ang balor sang nasambit nga mga proyekto. Suno kay Estante, una diri ang construction sang dalan nga nagalapad sang 20 metros nga magaumpisa sa entrance sang Iloilo Fishing Port pasulod sa fishing port,kag maagi sa likod sang North Baluarte, Boulevard, kag Calumpang sa Molo pakadto sa Calaparan, Sto Niño Sur kag Norte sa Arevalo tubtob sa Alegre, Oton.
Ini nga proyekto nga nagabalor P1.2 billion pesos ang may component nga drainage, elevated nga karsada kag dike.
Ikaduha, ang construction sang railway road nga nagalapad sang 20 metros kag nagalaba sang 20 metros.
Ini nga proyekto nga nagabalor sang P20 million ang magasugod sa eskina sang McArthur padulong sa Rizal, Lapaz.
Ang ikatatlo amo ang conversion sang local road kag himuon nga national road sa Donato Pison Avenue sa Mandurriao, Iloilo City sa diin pagabutangan ini sang 20 metros ka laba nga dalan kag may apat man ka lanes.
Suno kay Estante, sa subong proposal pa lang ini nga mga proyekto kag kinahanglan pa nga mapangitaan sang pondo.
