Patay ang tatlo ka indibidwal, samtang, naglab-ot naman sa 15 ka tawo ang nasamaran sa natabo nga pagpangluthang sa Brgy. Bagua 2 sa Cotabato City kagab-i, Sept. 13, 2026.
Natabo ini pila oras antes ang Bangsamoro Autonomous Region in Muslim Mindanao ukon BPE Parliamentary Elections.
Base sa impormasyon halin sa Cotabato City Police Office, natabo ang insidente sa tunga sang armado nga kalalakihan sa atubangan sang Datu Usman Mampen Elementary School sa nasambit nga lugar.
Ginpahayag nga nagdis-uganay ang supporters sang nagasumpunganay nga partido nga United Bangsamoro Justice Party kag Bangsamoro Federalist Party bangud sa puwesto sa pila.
Nagresulta ini sa sumbaganay tubtob nga nagtiniruhay ang mga ini.
Nahibaluan nga antes pa ini una na nga nag-atras ang masobra 800 ka mga manunudlo nga magaserbe kuntani bilang electoral board sa BPE .
Suno kay COMELEC Chairman Atty. George Erwin Garcia, madamo sa mga nag-withdraw ang nagikan sa probinsya sang Maguindanao del Sur.
Naglab-ot naman sa 137 ka mga manunudlo ang nagikan sa syudad sang Cotabato ang nag-atras.
Samtang may mga manunudlo man nga nag-withdraw sa Lanao del Sur, Tawi-Tawi, kag Special Geographic Area ukon SGA.
Ginakabig suno sa COMELEC nga ang presensya sang mga himata nga kandidato sa BPE 2026 ang ginapahayag rason sa pag-withdraw sang iban nga mga manunudlo.
Ginklaro man sang komisyon nga wala man sang igapasaka nga kaso sa nasambit nga mga manunudlo, apang nagpahayag man ang COMELEC nga mas maayo gid kuntani kun mas maaga ang mga ini nga nagkansela sang ila partisipasyon sa nasambit nga eleksyon.
Apang ginpasalig sang COMELEC nga may mga pulis nga handa nga magserbe bilang Special Electoral Board agud pun-an ang mga bakante nga posisyon.
Ini agud masiguro man nga magapadayon ang proseso sang pagboto sa mga polling precincts.
